Gedicht naor anleiding van de Waetersnoodramp van 1825

Schoelplak

Waor hawwe henne moeten, mien liefste,
awwe doe leefd hadden en de storm
as een woeste wildeman grote gatten
in de lege dieken sleugen hadde?
Hawwe een schoelplak vienen kund
as et broezende en kolkende waeter
kommen was, oons besprongen hadde
as een roofdier dat bloed reuk?
Hawwe mekeer vaasteholen kund tot
de storm bekwam en et waeter zakte?

Waor zuwwe henne moeten, mien liefste,
as de onverdreegzemhied groter wodt,
oonze vri’jhied koppien onder hullen
wodt deur ophitsers die macht roeken?
Zuwwe een schoelplak vienen kunnen
as meensken bevattelik binnen veur
valse woorden die deur de storm
over laand en waeter blaosd wodden?
Zuwwe mekeer vaasteholen kunnen tot
d’r weer blauw an de locht kommen zal?

Johan Veenstra